На Клиниката за гинекологија и акушерство во Клиничкиот центар ,,Мајка Тереза“ во Скопје , вечерва починала родилка врз која вчера бил спроведен царски рез и било констатирано дека бебето е мртво.
Случајот за Канал 5 го потврди директорката на Гинекологија, Викторија Јовановска, која повеќе детали најави за утре.
Јовановска информира дека станува збор за родилка на која ова и била 12-та бременост и дека досега имала шест абортуси и шест раѓања.
Од семејството на родилката велат дека таа на Гинекологија била однесена вчера и откако било направено Це Те Ге на детето било констатирано дека се’ е во ред и тврдат дека за тоа поседуваат и документ.
Како што кажуваат од Клиниката, пак, на жената и кажале дека Це Те Ге- то не е добро и ѝ рекле за саат време да се врати назад на уште една проверка. Но, кога ја побарале, таа била замината дома.
Според роднини на родилката, откако наводно ѝ било кажано да дојде денеска на нов преглед, по два часа од прегледот направен вчера на пат кон дома, како што објаснуваат нејзини роднини, родилката прокрварела и била повторно вратена назад, по што била подложена на царски рез.
