Легендарниот македонски виолинист и професор Зоран Џорлев почина како последица од Ковид-19, дознава „Мастило“.
Негови блиски роднини, пријатели и соработници веќе се збогуваат со него на социјалните мрежи.
Маестро Џорлев публиката го препознаваше и по серијалот ТВ-емисии посветени на традиционалната македонска песна.
Повеќе од две и пол децении беше во хармоничен брак со Офелија со која има два сина.
Џорлев е роден во Струмица на 10 јануари 1967 година, каде го помина детството. Талентот за музика го наследи од татко му Наско, признат композитор на народна музика и водач на оркестар. Во 1989 дипломира виолина на ФДУ.
Познат е по обработките и изведувањето на македонските народни и забавни композиции, обработки на филмски, џез и етно теми. Работеше како професор по виолина, а беше и директор на ДМБУЦ Илија Николовски Луј. Во јануари 2011 беше назначен за директор на ансамблот за народни игри и песни „Танец“ каде остана до август 2017 година.
