Драгољуб Ѓуричиќ, поранешен тапанар на легендарниот македонски состав „Леб и сол“, почина од последици на Ковид-19.
Важеше за еден од најдобрите музичари на овие простори, а низ годините соработуваше со големи ѕвезди како Горан Бреговиќ и Здравко Чолиќ.
Пејачи и инструменталисти од цел регион со емотивни пораки денеска се простуваат од Ѓуричиќ, а меѓу нив и нашиот легендарен гитарист Влатко Стефановски.
„Со голема тага во моето срце го споделувам овој пост. Мојот колега, брат, голем пријател и ангел чувар нѐ напушти денес“, напиша тој на „Инстаграм“ објавувајќи две црно-бели фотографии.
Кокан Димушевски објави црна позадина, а над фотографијата симболично напиша „Бубњарска тишина“.
Се огласи и Гарабет Тавитјан заедно со неговите синови.
„Денес неизмерно нѐ растажи заминувањето на легендарниот маестро и бубњар, г-дин Драгољуб Дјуричиќ. Неверојатен човек, музичка легенда и искрен пријател, голем човек, људина и поим за бубњарството на овие простори од историско значење. Искрено сочуство пријателе од Гарабет и целото семејство Тавитјан, ти благодариме за твоето пријателство, почитување, дружење и несебичниот дух, а посебно за историската музика што ја остави со „Леб и Сол“ и толку неброени други.. Балканска лавино, Бистра водо, Учи ме мајко.. Маестро, бубњај таму горе, направи и таму еден Дан Бубњара во вечноста. Почивај во мир Маестро. Те сакаме“, стои во нивното обраќање.
* Текстот не смее да биде превземан без дозвола на редакцијата на МАСТИЛО.
