Легендарниот актер Власта Велисављевиќ (95) почина од коронавирус, јавуваат српските медиуми.
Тој беше најстариот активен уметник во цела Европа и последниот жив глумец кој го запознал Нушиќ.
Преживеал два логора. Во 1943 година бил уапсен и однесен во нацистичкиот логор Дортмунд Херде. Успеал да побегне и да се врати во Белград. Потоа бил и на Голи Оток околу три години.
Власта трипати се женел, ја има ќерката Дубравка која живее во Америка и две внуки.
Со актерство почнал да се занимава на 14-годишна возраст. Во својата кариера остварил над 350 улоги во театар, на телевизија и на филм.
Голема популарност стекна во „Подобар живот“, а во театар преку 40 години играше во легендарната претстава „Болва во уво“.
Иако доживеа длабока старост и си ги сакаше годините, Власта не беше од оние кои со воодушевување го славеа роденденот.
– Си ги сакам годините, знаете тоа е мојот капитал. Кога би можел истиот да го уновчам во некоја банка, би било добро, но тие сакаат само да ви ги земат парите. Сепак, не го сакам тој ден, но ете блиските околу мене не ми дозволуваат неприметно да добијам уште една година – се пошегува Велисављевиќ во едно интервју.
* Текстот не смее да биде превземан без дозвола на редакцијата на МАСТИЛО.