Голема загуба
Почина проф. д-р Весна Пендовска, долгогодишна професорка на Правниот факултет „Јустинијан Први“ – Скопје и Универзитетот „Св. Кирил и Методиј“ во Скопје.
Тажната вест ја споделија вработените на Правниот факултет „Јустинијан Први” – Скопје на официјалната фејсбук-страница.
„Со нејзината смрт загубивме драга и почитувана колешка, која беше извонреден предавач, одличен педагог, посветен наставник и истражувач и особено ценет експерт во областа на науката во која делуваше. Проф. д-р Весна Пендовска беше и поранешна Претседателка на Комисијата за хартии од вредност, продеканка на Факултетот и членка на Деканатската управа во неколку мандати. Ќе остане запаметена како доајен од областа на финансовото право и финансиите“, стои во објавата.
Со емотивна посвета од Пендовска се прости и проф. д-р Ана Павловска-Данева, редовен професор на Правниот факултет „Јустинијан Први“ при Универзитетот „Св. Кирил и Методиј“ во Скопје.
„Весна ќе остане во нашите спомени и како драга пријателка, жена со ведар дух, секогаш забавна, подготвена да разговара за секоја тема со секој соговорник, да споделува совети кога од неа тоа сме го барале. Вечна и слава!“, напиша таа.
Фото: Фејсбук
* Текстот не смее да биде преземан без дозвола на редакцијата на МАСТИЛО.