Последните денови од неговиот живот ми ја распараа душата и ќе ги паметам додека сум жива. Секој ден одев болница и додека можеше да јаде и пие го хранев. Цело време ме држеше за раце. Многу ми е тешко, многу жално и потресно.
Ова е дел од ексклузивното сведоштво на пејачката Маријана Новачевска, поранешната сопруга на легендарен македонски композитор Тоде Новачевски кој почина по долго и тешко боледување.
Таа за ММС си ја отвори душата и проговори за најболното време кое го поминала со него пред да замине засекогаш. Вели дека сестра му и нивните две деца многу тешко ја поднесуваат загубата.
„Тоде трпеше голема болка и последните денови му ја дуплираа дозата. Пред крајот лекарот ми кажа дека тој веќе не е свесен за да контактира со нас, но дека може да не слушне. Тогаш, му ставив слушалки и на мобилниот му ги пуштав сите наши заеднички песни за да ги слуша. Беше премногу слаб за да реагира, само му течеа солзи низ образите. Плачеше тој, а плачев и јас. Се изнаплакавме заедно во болница. Тешко е, многу е тешко, и за мене и за децата и за целото семејство. А најмногу е тешко за него, истрпе многу големи болки. Животот навистина пишува романи, а секоја страничка е борба и надеж. Ние сите никогаш не престанавме да го сакаме нашиот Тоде“, раскажува Маријана за ММС.