Две нови снимки се појавија на „Јутјуб“ од ноќта кога во Белград исчезна 27-годишниот Матеј Периш. И двете видеа се од безбедносните камери на халата Бетон, местото од каде што му се губи секаква трага на момчето од Сплит.
Марко Маркановиќ, администраторот на фејсбук-групата „Исчезнатиот Матеј Периш“ и на вајбер-групата „Правда за Матеј“, неодамна првпат се огласи во медиумите. Тој истакна дека му се јавуваат луѓе од Хрватска, Босна, Србија, Германија, Шведска, па дури и од Америка, а многумина од нив нудат и парична помош. Сепак, тој се осврна и на лажните дојави, како и за поединците кои објавуваат фотошопирани снимки и фотографии со Матеј и на тој начин штетат на истрагата.
„Морам да дополнам дека е голем проблем што луѓето се служат со лажни објави да добијат публицитет. Последна таква дојава беше дека Матеј е виден во Нови Сад. Има многу профили кои наводно се бават со истрагата, а всушност ја искривуваат вистината“, изјави тој.
Марко тврди дека неговите акаунти се единствените на кои се споделуваат релевантни информации, како и дека тој е во постојан контакт со Ненад Периш, таткото на Матеј.
„Освен дојави, секојдневно добивам и закани. Оние со поексплицитна содржина ги пријавувам во полиција и потоа таа соодветно реагира“, откри Маркановиќ.
Матеј Периш исчезна во Белград ноќта помеѓу 30 и 31 декември. По напуштањето на ноќниот клуб „Готик“ му се губи секаква трага.
* Текстот не смее да биде превземан без дозвола на редакцијата на МАСТИЛО