Лаура Хит, зависничка од дрога од Велика Британија, е осудена на 20 години затвор за убиство на нејзиниот син астматичар. Пред пет години Хаким Хусеин (7) починал во семејниот двор „борејќи се за здив“, јавува „Скај њуз“.
Оваа 40-годишна жена од Бирмингем е осудена за убиство од небрежност. Во пресудата стои дека смртта на Хаким е резултат на „катастрофалното и тажно“ родителство на неговата мајка.
Фотографиите кои биле прикажани во судот ја откриле болната вистина. Лаура која трошела 55 фунти дневно на дрога, со фолија и еластична лента модифицирала еден од инхалаторите на синот за да може да го користи за пушење крек.
Хит се изјаснила за виновна за четири точки од обвинението, вклучително и необезбедување соодветен медицински надзор и изложување на Хаким на чад од хероин, крек и цигари, кои се предизвикувачи за нападите на астма.
Случајот е проследен со низа контроверзи, откако социјалните служби на Бирмингем пропуштиле очигледна можност да ја спречат смртта на момчето.
Хаким живеел во исклучително лоши услови. Немал кревет и спиел на софата. Дури постојат докази дека Лаура ја користела спалната соба на катот за сексуална работа за да ја финансира својата навика. До креветот била пронајдена корпа со кондоми.