Почина проф. д-р Зоран Нарашанов, претседател на Управниот одбор и генерален директор на компанијата „Винер-Виена Иншуренс груп“.
Тажната вест на „Фејсбук“ ја споделија неговите колеги.
„На ден 25.07.2022 ВИНЕР-Виена Иншуренс Груп АД Скопје го загуби човекот кој со 15 години неуморно водење и беспрекорно лидерство го постави патот на успехот и ја направи компанијата она што е. Проф. д-р Зоран Нарашанов, непресушниот извор на ведрина и поддршка во секакви моменти, големиот интелект, спремен за нови предизвици, идеи и искуство, несебично инспирирајќи не’ и пренесувајќи ги на нас, беше непроценлив подарок во нашите професионални животи. Во ВИНЕР нема да биде исто без него“, е наведено во објавата.
Нарашанов беше доктор по економски науки кој магистрирал во областа на индустриско инжинерство и менаџмент. Беше дел и од менаџерскиот тим на „Кјуби Македонија“, но и главен директор за човечки ресурси и право во АД „Македонски Телеком“ како и генерален директор и претседател на Управниот одбор на „Сигма“ АД-Скопје.