Домашниот спорт загуби уште еден голем човек
Почина Славе Атанасовски-Чаве, првиот селектор на нашата ракометна репрезентација. Под негово водство, Македонија во 1993 година го одигра првиот официјален репрезентативен меч во Романија.
Играчката кариера ја почна како голман во Партизан, но брзо беше прекомандуван во бек. Потоа премина во Графичар, клубот кој подоцна се трансформираше во Вардар. Беше дел и од Борец, Металург и Пролет.
Како тренер, освен како селектор на Македонија, беше ангажиран и во велешки Борец, но и во скопски Вардар. Еден период работеше и во соседна Грција.
Беше и професор по физичко образование, а успешно се снајде и во угостителскиот бизнис.
Атанасовски беше роден 1945 година.
