Сериозна загуба
Во Прилеп почина познатиот историчар на уметност Илија Велкоски-Ѕаната.
Тажната вест ја споделија администраторите на фејсбук-страницата на градската библиотека „Борка Талески.
„Велкоски беше ерудит во својата област, целиот свој работен век го посвети на промоција, создавање, афирмација и развој на културата во Прилеп и пошироко.
Беше долгогодишен директор на „Завод и Музеј“-Прилеп, а со успех ја извршуваме и функцијата директор на центарот за култура „Марко Цепенков“-Прилеп. Ќе остане запаметен како исклучителен познавач на културното наследство на Прилеп и Македонија“, пишува во објавата.
„Покрај професионалната реализација, Велкоски имаше активен општествено-политички ангажман. Последните години од својот живот ја извршуваше функцијата претседател на општинската организација на Сојуз на борци-Прилеп, како познавач и почитувач на историјата и традициите од НОБ.
Илија Велкоски-Ѕаната беше долгогодишен соработник на градската библиотека „Борка Талески“-Прилеп. Секогаш активно се вклучуваше со свои излагања при одбележување на значајни културно-историски датуми во организација на нашата установа. Неговата приватна раритетна библиотечна збирка е забележана и во книгата „Семејните библиотеки во Прилеп“.
Неговото заминување е сериозна загуба за општествениот и културен живот на градот. Вработените во библиотеката изразуваат длабоко сочувство до семејството. Почит и вечна слава!“, завршува посветата за Велкоски.
