Качила температура и се пожалила на силни главоболки. Неполни две недели подоцна починала
Смртта на Ангелина ја згрози јавноста откако нејзината мајка ги објави резултатите од обдукцијата и го впери прстот кон лекарите.
Дванаесетгодишното девојче од Новосибирск во училиште примило вакцина против менингоенцефалитис што се пренесува преку крлежи. По имунизацијата, се пожалила на силни главоболки и качила температура, па итно била хоспитализирана.
Докторот, според зборовите на нејзината мајка, утврдил дека има САРС. Неколку часа подоцна ученичката паднала во кома, а неполни две недели подоцна починала.
Вера, мајката на Ангелина Вахненко, конечно ја доби хистолошката анализа околу причините за смртта, а резултатите ја шокирале.
„Во болницата на почетокот ми рекоа дека ќерка ми има гноен менингитис. Со таква дијагноза, повеќе од 90 отсто од пациентите умираат, речиси е невозможно нешто да се направи. Но, според последните анализи, таа имала тип на менингитис што успешно се третира и можела да биде спасена, но докторите изгубија драгоцено време лечејќи ја од САРС“, раскажува мајката скршена од болка.
Веќе е поднесена и кривична пријава за предизвикување на смрт од небрижност, но досега никој не е обвинет. По смртта на Ангелина, училишната медицинска сестра си дала отказ. Тамошните медиуми пробале да ја слушнат и нејзината страна од приказната, но таа е недостапна за новинарите.
* Текстот не смее да биде преземан без дозвола на редакцијата на МАСТИЛО.