Вознемирувачкото видео кое се појави на социјалните мрежи прикажува како тинејџер од Флорида брутално тепа наставничка, откако таа му ја конфискувала конзолата за видео-играта Nintendo Switch за време на часот.
На видеото се гледа како бесното 17-годишно момче трча кон учителката која го забележува напаѓачот на дел од секундата пред да биде турната на подот.
Ученикот тежок 120 килограми потоа неконтролирано ја удира и гази професорката во средното училиште Матанзас во Палм Коуст.
Неколку други вработени кои сега ќе бидат и клучни сведоци на бруталниот напад, истрчуваат да го одвлечат насилникот..
Наставничката е итно пренесена во локалната болница. Се очекува таа да се опорави од повредите.
Посебно видео објавено од канцеларијата на шерифот на округот Флаглер покажува дека напаѓачот е врзан со лисици во училницата во средното училиште Матанзас.
„Ученикот ни изјави дека се вознемирил откако му го одзеле уредот за видео-игри за време на часовите“, соопшти полицијата.
Бесниот ученик им порачал на полицајците дека ќе ја „убие“ наставничката кога ќе се врати на училиште. Тој веќе е предаден на Одделот за малолетничка правда и обвинет за напад.