Музичарот и басист на британскиот бенд „Палп“, Стив Мекej, почина на 56-годишна возраст. Тажната вест ја потврди неговата сопруга Кејти Гранд, која напиша дека е „уништена и скршена“.
Се огласи и бендот на социјални мрежи.
„Нашиот сакан пријател и басист почина утрово. Нашите мисли се со неговото семејство и со најблиските“, напишаа тие во соопштението објавувајќи фотографија од Мекеј како шета низ природа.
„Оваа фотографија на Стив е од времето кога „Палп“ беа на турнеја во Јужна Америка во 2012 година. Имавме слободен ден и тој предложи да се искачуваме на Андите. Така и направивме“, се вели во објавата на поп-бендот од Шефилд кој беше мега-популарен во 90-тите.
Засега не е позната причината за смртта. Мекеј позади себе ги остави синот Марли и сопругата Кејти.
„По три месеци во болница, борејќи се со сета своја сила и решителност, шокирани сме и скршени што се збогувавме со брилијантен и неверојатно убав човек“, напиша Кејти.
