Магазинот „Убавина и здравје“ објави нов исечок од ексклузивното интервју со Лила Филиповска кое веќе е во продажба, а во кое таа првпат отворено зборува за ракот на дојка.
Македонската водителка и инфлуенсерка открива детали за зафатот кој го направила во Истанбул.
„Операцијата траеше пет часа и помина успешно. И додека некои мислеа дека во Истанбул сум на шопинг, јас бев на операција. Иако, морам да ви кажам, неколку дена по операцијата морав да чекам да ми ги извадат дреновите, но јас не лежев туку шетав низ Истанбул со другарка ми и со три дрена во џебовите“, раскажува таа за „Убавина и здравје“.
Лила нагласува дека канцерот ѝ го променил животот, но не и нејзината вредност. Никој не знаел што ѝ се случува, освен најблиските. По повеќе од една година исполнета со неизвесност, очекувања, терапии и стравови, конечно ја доби најважната животна битка.
Откако специјално пред објективот на Дарио Јанковиќ конечно позира без перика, Лила со својата природна кратка коса синоќа се појави и на отворањето на традиционалниот Саем за венчавки.
