Мајката на момчето кое уби девет свои врсници и чуварот на основното училиште „Владислав Рибникар“, во средата била сослушана во полиција и во таа прилика детално ја раскажала својата верзија за приказната за детството на нејзиниот син, неговото здравје, неговиот однос со врсниците, семејните односи..
Таа ги опишала и неговите денови пред масовното убиство на трети мај, а особено се задржала на кобниот ден, на претпладнето кога момчето со пиштолите на татко му и молотовите коктели се упатил на училиште.
Миљана Кецмановиќ била сослушана откако Првото основно јавно обвинителство во Белград по службена должност наредило да биде испрашана за да се утврди дали го напуштила или малтретирала нејзиниот син пред тој да го изврши масакрот во училиштето.
Како што дознава „Блиц“, мајката на Коста низ солзи го опишала својот син како болникав и паметен и истакнала дека ништо не ѝ укажувало дека тој може да стане масовен убиец. Сега останува на обвинителството да открие колкава вистина има во нејзините зборови во продолжението на истрагата.
Изворот на „Блиц“ вели дека мајката на момчето убиец раскажала како нејзиниот син бил надвор од градот со друго дете и неговата мајка пет дена пред злосторството. Таму заедно го поминале први мај, по што се вратиле во Белград.
„Мајката рекла дека Коста се вратил во Белград со другарот и неговата мајка, додека таа, сопругот и ќерката биле во друго возило. Коста, како што рекла, дошол дома еден час пред нив и се туширал во моментот кога пристигнале останатите членови на семејството. Таа тврди дека не забележала никакви промени во неговото однесување“, открива соговорникот.
Ден подоцна, на втори мај, Коста и неговата сестра не отишле на училиште туку кај баба им и дедо им, а вечерта се вратиле и заедно гледале филм.
Мајката се сеќава дека нејзиниот син во еден момент отишол во продавница да купи намирници, но и тој ден не видела ништо чудно во неговото однесување. Наводно разговарал со родителите за филмот што го гледале и за други теми што го интересираат, вели изворот.
За кобниот трети мај кога се случи масакрот, мајката раскажала дека станала прва за да им подготви појадок на децата. Нејзиниот сопруг отишол на работа, по што таа ги разбудила. Таа тврдела дека и тогаш не забележала ништо чудно во однесувањето на нејзиниот син, освен што бил бавен за време на појадокот и при подготвувањето за на училиште.
Момчето наводно ѝ рекло на мајка си да не се грижи, бидејќи учителката може да доцни. Мајката тврдела дека потоа отишла да ја однесе ќерка си на училиште, а момчето останало дома и самото се спремило“, раскажува изворот на „Блиц“ запознаен со случајот.
Еден час подоцна мајката слушнала за пукањето во училиштето. Таа во полиција изјавила дека мислела дека нејзиниот син е ранет во пукотницата и веднаш се упатила кон школото каде ја дознала вистината.
Била вознемирена и сè уште ѝ е тешко да поверува дека нејзиниот син го направил ова и инсистирала дека ништо не укажувало дека вакво нешто можело да се случи. Таа истакнала дека и самата е желна за објаснување и за одговори“, завршува изворот.
