На 53-годишна возраст почина Шенон Доерти, поранешната ѕвезда од хит-серијата „Беверли хилс“.
Актерката ја загуби битката со ракот, а тажната вест за „Пипл“ ја потврдија нејзините најблиски.
„Со тешко срце ве информираме дека почина актерката Шенон Доерти. Во саботата, на 13-ти јули, ја загуби битката со ракот по долги години борба“, потврди нејзината долгогодишна колешка Лесли Слоун.
„Таа беше посветена ќерка, сестра, тетка и пријателка. Беше опкружена со своите најблиски, како и со нејзиното куче. Семејството моли за приватност во овие тешки мигови“, изјави таа.
Легендарната Бренда пред една година дозна декаканцерот ѝ се проширил на мозокот. Со своите следбеници редовно споделуваше моменти од храбрата битка.
И покрај сите премрежја, славната Бренда продолжи да се бори како лавица која се однесуваше како ништо да не се случува.
„Не сакам да се однесувам како да умирам. Сакам да работам и да се однесувам како ништо да не се случува бидејќи ќе се борам да останам жива”, изјави Шенон во едно нејзино интервју.
