Катерина Крстева, македонската театарска, филмска, телевизиска и гласовна глумица, најпозната на јавноста како Мара Попара, почина пред неполни две години.
По пензионирањето живееше тивко и повлечено се’ до нејзината смрт во јануари 2023 година.
Не’ засмејуваше сите, во јавноста секогаш беше ведра и насмеана, но позади камерите животот воопшто не ѝ бил лесен.
На Крстева сега се сети и Горан Марковски, администратор на фејсбук-страницата „Бардовите на македонското глумиште“. Тој откри досега непознати детали за неа, а неговата објава ви ја пренесуваме во целост.
„Дали се сеќавате на неа?! Смеењето е здравје, а таа не смееше и премногу! Бескрајно талентираната актерка Катерина Крстева на сите позната под надимакот Мара Попара, која цел живот го помина на сцената да ја насмее публиката, самата таа доживеа голем удар и свена од тага. Само 4 месеци по смртта на нејзиниот 35 годишен син, почина нашата голема актерка во 81-та година од својот живот.
Вистиско медицинско чудо се случило кога синот единец го добила на 46 годишна возраст, го израснала покрај себе во и околу театарот! Трагедиите за ова семејство почнале кога најпрво од овој свет заминал нејзиниот сопруг, потоа синот и најпосле таа.
По пензионирањето сосема се повлекла од јавната сцена. Живеела повеќе и од скромно со 20.000 пензија. Сами, таа и синот, кој бил весел по природа но со свои проблеми.
Денес, Катерина Крстева заедно со својот сопруг и синот почиваат на бутелските гробишта во Скопје. Дали државата направила доволно за неа додека била жива, но дали ќе направи нешто за неа и по нејзината смрт?! Почит, наклон и вечно сеќавање кон нејзиниот лик и дело!“.
