Шарлби Дин беше ѕвезда во подем која одигра маестрална улога во канскиот лауреат „Триаголник на тагата“ пред да почине на само 32 години.
Младата актерка и модел почина на 29 август 2022 година. Иако постоеше сомнеж дека причина за смртта била вакцината против Ковид-19, нејзиниот брат Алекс Џејкобс подоцна за медиумите потврди дека тоа не е така.
Актерката починала поради компликации од рутинска операција која ја имала во своите рани 20-ти. Таа доживеала тешка сообраќајна несреќа во 2009 година, по што лекарите ѝ ја отстраниле слезината. Во несреќата се здобила и со скршеници на ребрата и повреди на грбот.
Медицинскиот истражител од Њујорк подоцна потврди дека причината за смртта е сепса. Нејзината бактериска сепса настанала откако била заразена со бактерија позната како Капноцитофага.
Иако инфекцијата е ретка, постојат различни видови на такви инфекции кои се развиваат во устата на луѓето, а се присутни и во устата на животните. Луѓето со автоимуни проблеми и без слезина се особено чувствителни.
Во својата релативно кратка актерска кариера оваа убавица имаше уште неколку забележителни ролји во остварувањата „Black Lightning“, „An Interview with God“ и „Spud“.
Само четири месеци пред да почине, Шарлби се сврши со долгогодишното момче Лук Чејс Вокер кој симболично ја запроси на Менхетен, на истата улица каде што првпат се бакнаа.
