Ленче Кукиќ пред три години во екот на пандемијата заврши во скопската болница „Осми септември“ откако заедно со нејзиниот сопруг беа хоспитализирани поради компликации со Ковид-19.
Во тој период пејачката се здебелила дури 30 килограми, иако, како што вели не јадела многу. Посетила повеќе нутриционисти и се држела по нивните редоследи и правила, но тоа не ѝ помогнало, а и не може да си објасни зошто.
Во меѓувреме успеа да „стопи“ 20 кила за само една година, а сега конечно откри како ѝ успеало тоа.
„Почнав секое утро да пијам вода и да појадувам околу 10.30 часот. Јадам сѐ, но почнав да не ги мешам јадењата. Ако на пример наутро јадам тестенини, ставам во нив само едно мало парче путер, повеќе сол и толку. Нема сирење, нема кечап, ни мајонез. Ручам околу 17.30 часот и толку. За време на ручекот јадам сѐ: леб, салата, ориз, месо, и во меѓувреме, во текот на денот, не пијам газирани пијалоци и не јадам никакви грицки. По природа не сум многу по благите работи. Доволна ми е само една коцка чоколадо“, раскажува пејачката за порталот „Женски магазин“.
Вели дека сега има повеќе енергија и дека е благодарна што си направила еден свој режим на исхрана. Не се брзала, за, како што вели, да не ѝ се вратат килограмите како бумеранг.
Ленче Кукиќ и нејзиниот сопруг Горан се поранешни победници во популарното регионално шоу „Никогаш не е доцна“. Повеќе од две децении заедно настапуваат со бендот „Јупитер“.
Во музичкиот свет веќе сигурно чекори и нивниот син Иван, кој последниве години редовно настапува и со нашиот легендарен гитарист Влатко Стефановски.
