„Работам насекаде. Моментално, најмногу настапувам во ресторан во прекрасниот Дојран. Настапувам и во Скопје, Куманово… Но, го издвојувам Дојранското езеро“, вели Кире Науновски од Свети Николе кој победи на Фејсбук-гласањето во финалето на музичкото натпреварувачко шоу „Никогаш не е доцна“.
Нашиот победник за „Гранд онлајн“ објасни и зошто ужива кога времето го поминува покрај езеро.
„Голем љубител сум на риба, сакам да ја јадам, ама и да ја ловам. Она што најмалку го јадеме е рибата, а таа е најдобра“, порачува Кире.
„Мојата сопруга ја подготвува, но не ја јаде. Тој дел ни го остава мене и на помладиот син. Ниту мојот постар син, ниту мојата сопруга не сакаат да јадат риба“, открива Науновски.
Тој раскажа и какви планови има сега по победата.
„Понеделник, вторник и среда се моите слободни денови. Така ми е целиот мој живот. Потоа уживам цел ден, најчесто сум дома со децата. Мислам дека времето поминато така е непроценливо. Всушност, обично имам половина од неделата слободна. Работам во петок, сабота и недела, остатокот од времето сум дома. И тоа е одлично и прекрасно. Имам колку што сакам слободно време“, вели Кире.
