Елизабета Ефтоска (47) од Гостивар блесна во последната епизода на регионалното музичко натпреварување „Никогаш не е доцна“.
Иако професионално почнала да настапува пред само две години, музиката била нејзината прва и најголема љубов.
„Во основно училиште по ходниците пеев и сите ме слушаа. Бев и во хор, тоа беше сè. На матура првпат запеав на микрофон. Од пред две години настапувам со мојот бенд“, кажа таа во своето претставување.
Елизабета е семејна жена и, како што вели, најгорда е на своето семејство.
„Сопруга сум и мајка на три деца. Среќна и задоволна жена. Имам прекрасен маж, деца и го работам тоа што го сакам“, откри Ефтоска.
За првиот круг ја одбра песната „Нежна жена“ од Лепа Брена, а од Дејан Матиќ доби јавна покана да гостува на некој од неговите концерти во Македонија. По настапот, членовите на жирито редеа само пофалби за нејзиното пеење и изглед.
„Многу тешка песна, бара многу вештина, знаење, талент. Сè покажавте, за првпат одлично,“ рече Маре.
„Толку си убава, какви холивудските актерки. Толку е убаво да те гледаме, прво да те слушаме, па потоа да те гледаме. Милина,“ додаде Лена Ковачевиќ.
„По пеењето би рекол дека имаш 25 години пејачка кариера. Сега мојата одлука е конечна – сигурно ќе бидеш моја специјална гостинка во Гостивар,“ заклучи Дејан Матиќ.
