Новиот градоначалник на Карпош, Сотир Лукровски, и претседателот на Советот на Општина Карпош, Христо Саракинов, ѝ го честитаа 100-от роденден на Слава Коцевска.
Фотографии од средбата споделија од Општината, а баба Славка им ја раскажа својата животна сторија.
Родена е во Штип во далечната 1925 година, а најголемиот дел од својот живот го поминува во Карпош.
„Нашата стогодишна хероина напоменува дека ја добива најголемата поддршка од своето многубројно семејство. Имено, баба Славка е мајка на три деца (има два сина и една ќерка), но како што вели, најмногу се гордее со тоа што е баба, прабаба и чукунбаба. Во нејзиниот топол дом исполнет со раскошно цвеќе доминираат живописните гоблени кои самата ги изработила“, пишува, меѓу другото, во објавата.
„Љубовта кон најблиските, слогата и заедништвото се тајната за мојот долговечен и спокоен живот“, вели една од највозрасните жителки на Карпош.
