Електроинженерот кој сака да се занимава со музика, Виктор Димитриевски (47) од Куманово, ги освои симпатиите на публиката и на жирито по одличниот настап во шоуто „Никогаш не е доцна“, во кое покажа мноштво таленти.
Нашата Каролина Гочева како специјална гостинка во жирито имаше чест прва да му се обрати на својот сонародник, и тоа на македонски јазик. Истакна дека ги оправдал сите очекувања.
„Навистина имаш самодоверба и ја чувствувам твојата позитивна енергија што ја носиш. Морам да нагласам и дека пееш многу музички точно и ти посакувам среќа и да те гледам и во следниот круг“, рече Каролина.
„Прашав дали има некој Македонец, а исто така ми рекоа дека не си дошол со празни раце. А гледам дека не само што си електроинженер кој се занимава со музика, туку си трчал и маратон. Воопшто не е лесно да трчаш маратон, покрај сè друго што го работиш! Браво!“, ја пофали таа сестраноста на натпреварувачот.
Виктор ја изведе песната Laže mjesec од Харис Џиновиќ и го крена студиото на нозе. Водителката Драгана Катиќ веднаш констатираше дека публиката е освоена.
