Од синоќа, главна тема во медиумите повторно е Тина Русева.
Таа победи на престижното музичко натпреварување The voice of Europe уште еднаш покажувајќи го сиот свој раскошен талент.
Русева има само 20 години. Родена е и порасната во Струмица, но веќе подолго време живее во Германија. Во едно интервју минатата година откри дека таму завршила општа гимназија и дека планира да се запише на факултет за да студира менаџмент.
За нејзината љубов кон музиката во повеќе наврати раскажа дека пее откако знае за себе. Талентот прво го препознале нејзините дома.
Во својата музичка биографија има запишано два настапа на струмичкиот детски фестивал „Јојо“, но учествувала и на повеќе интернационални натпревари од кои најпознат е славниот „Славјански базар“ во Белорусија.
Русева работи и на своја авторска музика, а пред да се прослави во шоуто The voice промовираше и нова песна.
