Добрила Ивановска-Чабриќ, победничката на ветераните во шоуто „Никогаш не е доцна“, со право ја нарекуваат супербабичка.
Секогаш насмеана и исклучително витална, таа и на 98 години вози автомобил и сама си ги завршува обврските.
Сепак, животот не ја мазел воопшто, но, како што самата раскажа во една прилика, успеала да се справи со сите предизвици и да дочека длабока старост.
Една од семејните трагедии за која во едно интервју кажа дека ѝ е и најголема болка е загубата на синот. За него кратко зборуваше во една емисија.
„Ако јас мојот син не успеав да го убедам дека животот е убав и дека треба јас да сум му пример, јас немам права да заминам по него. Тој крена раце од себе си, од животот, тој не сакаше да се лечи. Замина прерано и велам дека немам право да заминам по него затоа што мене тој пат секако ме чека“, раскажа Добрила.
Во животот секогаш ја гледала убавината и позитивната страна, и тоа ѝ давало сила.
„Пресреќна сум што имам поколение од својот син, што мојата крв оди понатаму. Затоа, имам сила да живеам, сакам да живеам и ќе им бидам пример на сите како треба да живеат“, дополни пејачката.
