Виктор Димитриевски ја оствари својата голема желба кога беше повикан да учествува во единаесеттата сезона на познатото регионално шоу „Никогаш не е доцна“, каде што ги освои симпатиите на публиката и на жирито.
Со насмевка на лицето, Виктор излезе на големата сцена каде што во последната емисија настапи прв, а за своето претставување ја избра песната „Лејла“ од Хари Варешановиќ.
Македонецот уште еднаш успеа да го воодушеви жирито со својата интерпретација, за која доби бројни комплименти.
– Навистина одлично, никогаш не треба да се сомневаш во своите можности, особено во држењето на тоновите. Го оправда своето доаѓање во овој круг – му порача Саша Милошевиќ Маре.
Алка Вуица се надоврза со можеби најубавиот комплимент што можел да го слушне.
– Мене многу ми се допадна што Виктор во првиот дел од песната беше емотивен и длабок. Викторе, морам да те потсетам на една приказна од Библијата. Кога Бог ги делел дарбите, ги обврзал луѓето да ги негуваат. Не разбирам зошто толку долго си чекал. Мислам дека ти е божја должност да се занимаваш со пеење, бидејќи тоа го правиш неверојатно – порача пејачката, а комплиментите не изостанаа ниту од Стефан Петрушиќ.
– Морам да признаам дека уживав. Избравте одлична песна за натпреварување, таа беше и еден од моите избори – додаде пејачот.
Во ревијалниот дел ја изведе песната „Море туге“ заедно со Александра Цака Иванов, која публиката ја запозна преку „Ѕвездите на Гранд“, а вечерва беше пејачка поддршка на кандидатите на големата сцена на шоуто.
Фото: Гранд.Нова.рс
