Во подножјето на ридот со манастирскиот комплекс, под археолошкиот локалитет Говрлево, во близина на Долно Солње, се наоѓа црквичката „Светите Кузман и Дамјан“.
Меѓу верниците е позната по лековитата вода што извира во нејзиниот олтарен дел.
Изградена во поново време, 1936 година, на место на кое извирала вода, оваа црква е дел од пресното сеќавање на жителите на околните села.
– По многу различни неволји и несреќи што се случувале поради користењето на водата од лековитиот извор за непотребни цели, на еден од селаните му се сони дека таа е лековита и дека на местото треба да подигне храм на светите Кузман и Дамјан, во православниот свет познати и како лекари, кои никој не можел да ги купи, викани светите бессребреници. Низ годините, црквичката е целосно реновирана и денес има преубав изглед. Преполна е за време на викендите и на верските празници. Верниците ја користат водата за проблеми со видот и со колената и многумина од нив чудотворно биле излекувани – појаснија во една прилика локалните жители од селата околу Говрлево.
Изворот со водата за која многумина веруваат дека е лековита се наоѓа во црквата. Ограден во форма на крст, тој е лоциран точно во олтарот на православниот храм посветен на светите Кузман и Дамјан, под фреска со мотиви на кои се прикажани верници пред чудотворната вода.
Една друга легенда за оваа црква, пак, вели дека славниот римски император роден во околината на Скопје, Јустинијан Први, во неа пронашол лек за својата болест.
