Почина Никола Проески, таткото на легендарниот македонски пејач Тоше Проески.
Тажната вест на социјалните мрежи ја сподели неговата ќерка Дора.
„Светол патот, татко мој“, напиша таа на „Фејсбук“.
По смртта на Тоше, неговиот татко тагуваше тивко и достоинствено. По семејната трагедија само еднаш се огласи јавно, во 2015 година кога беа објавени снимки од СДСМ според кои тогашниот министер за транспорт Миле Јанакиески и неговата колешка Елизабета Канческа-Милевска зборуваат за наводна партиска непослушност на семејството на Тоше.
Тогаш Никола во изјава за „24 вести“ порача неговиот син да биде оставен да почива во мир.
„Праќам апел до целата јавност до сите Македонци, Албанци, Власи, Срби, Бошњаци, Роми, Турци и сите останати, јас Никола Проески велам ако сме криви нека излезе правдината на мегдан и ве замолувам да ми ја оставите фамилијата на раат, посебно син ми Тодор“, изјави тој.
