Нова тажна вест денеска го потресе светскиот шоубизнис
На 63-годишна возраст почина славната американска пејачка и актерка Ајрин Кара, која се прослави со насловните теми од легендарните филмски остварувања Flashdance и Fame.
Трагедијата ја потврди и нејзината портпаролка Џудит Мус. Таа откри дека починала во семејниот дом во Флорида, но причината за смртта не ја соопшти.
„Ова е апсолутно најлошиот дел од работата за еден публицист. Не ми се верува дека ова морав да го напишам, а камоли да го објавам. Ве молиме споделете ги вашите спомени и сеќавања за Ајрин. Ќе ги прочитам сите и ќе знам дека таа се насмевнува од рајот. Едноставно ги обожаваше своите фанови“, напиша Џудит на „Твитер“.
Ајрин Кара почна да снима музика уште како дете и беше ѕвезда во бројни мјузикли на Бродвеј. Големиот пробив го направи во 1980 година кога ја доби една од главните улоги во филмскиот мјузикл Fame во кој ја отпеа и насловната песна. За овој ангажман доби номинација за „Златен глобус“ за најдобра актерка, а освои Греми. Три години подоцна го сними безвременскиот хит Flashdance: What a Feeling! и ги освои речиси сите можни признанија, вклучувајќи ги и најпрестижните три-„Оскар“, „Златен глобус“ и „Греми“.
* Текстот не смее да биде преземан без дозвола на редакцијата на МАСТИЛО.