Доцна вечерва повторно се огласи братот на починатиот ракометар Денис Тот.
Борис го демантира тоа што наводно се гледало на безбедносните камери и негира дека Денис бил нападнат од две лица, дечко и девојка, во близината на дискотеката „Привилиџ“, како што објави „Вистиномер“, онлајн медиумот кој врши проверка на фактите и објавите.
„Многу им благодарам на господата новинари за „професионалноста“. Засрамете се поради пласирањето на дезинформации во јавноста и за ширење лаги поради повеќе кликови. Денис почина од срцев удар, а не од било какви телесни повреди, тепачка и останати глупости кои во текот на целиот ден беа напишани.. Срамота е да градите публицитет на туѓа несреќа!“, напиша Борис на „Фејсбук“.
Според извештајот на МВР, ракометарот на Бутел вчера во 04:11 часот бил донесен на Клинички центар во Скопје без видливи траги на насилство. Дека не бил претепан потврди и директорката на КАРИЛ, доктор Маја Мојсова, која изјави дека бил хоспитализиран во критична состојба и без срцева акција. Сепак, првичните шпекулации дека Денис бил нападнат, во текот на денот повторно се актуелизираа.
* Текстот не смее да биде превземан без дозвола на редакцијата на МАСТИЛО.
