Еден од најпознатите британски пејачи на фолк музика, Роџер Витакер, почина на 87-годишна возраст.
Во соопштението на неговото семејство, кое го објави германски „Билд“, се наведува дека уметникот починал на 13. септември во болница во јужна Франција.
Познатиот пејач ги испеа хитовите Durham Town, New World In The Morning и верзија на Wind Beneath My Wings. Остана забележана и неговата соработка со Дес Оконор на Skye Boat Song од 1986 година.
„Роџер беше култен уметник, прекрасен сопруг и татко. Допре многумина со својата музика и секогаш ќе живее во нашите срца”, се наведува во соопштението на семејството на славниот пејач.
Беше во брак со сопругата Натали од 1964 година, со која има пет деца, Емили, Лорен, Гај, Џесика и Александар. Зад себе остави и 11 внуци.
Витакер бил кремиран на приватна церемонија во саботата, пренесува „Билд“.
