Девојка од Колумбија починала од тешки повреди на главата откако скокнала од такси во движење поради расправија за цената на превозот
Марија дел Кармен Карденас (34) мислела дека таксистот ѝ наплаќа поскапо за возењето, што ја натерало да скокне од автомобилот. Инцидентот се случил во Баранкиља во северна Колумбија на 26 јули, а повредената девојка починала во болница во неделата.
Локалните медиуми јавуваат дека таксистот и патничката почнале да се расправаат за тарифникот. Марија наводно одбила да ја плати сумата која ја сметала за превисока, а возачот и се заканил дека ќе ја врати на местото каде што го запрела. Потоа таа наводно ја отворила вратата од таксито и излегла од возилото кое се движело со голема брзина.
Удрила со главата на патот и се здобила со тешки повреди. Таксистот итно ја однел во блиската болница каде што починала по 11 дена на интензивна нега.
Цената за која Марија и таксистот се расправале била само 17.000 колумбиски пезоси, или приближно 240 денари.
Колумбискиот весник „Ел Хералдо“ го цитираше портпарол на сообраќајната полиција.
„Таксистот побарал 17.000 пезоси за возењето, а патничката му одговорила дека нема да плати толку. Тој ѝ рекол дека ќе ја врати назад на местото каде што го запрела, а сопатничката ја отворила задната врата и скокнала од возилото“, велат од полицијата.
Колумбиската полиција поведе истрага за да утврди кој е одговорен за смртта на младата жена.