На 59-годишна возраст почина американскиот актер Дејвид Гејл, најпознат како доктор Џо Сканлон во повеќе од 200 епизоди на Порт Чарлс, спин-оф на серијата Општа болница.
Македонската публика го памети како Стјуарт Карсон, вереникот на Бренда Волш (Шенон Доерти) во легендарната тинејџерска серијата Беверли Хилс 90210.
Причината за смртта е непозната, а тажната вест ја потврди неговата сестра Кејти Колменарес.
„Речиси и немаше ден во мојот живот да не си бил покрај мене, секогаш мој придружник, секогаш мојот најдобар пријател подготвен да се соочи со се’ и секого за мене“, напиша таа.
„Секој ден ќе го чувам во моето срце. Ти беше прекрасно, сакано и неверојатно човечко суштество кое ќе недостига секоја секунда, секој ден, засекогаш“, дополни во истата објава.
За смртта на Дејвид свое обраќање имаше и Пит Фериеро, водител и продуцент на подкастот Беверли Хилс 90210.
„Тој беше исполнет со живот и неверојатни приказни. Благодарен сум што го познавав. Многу сум тажен поради оваа загуба на светот. Тој беше подарок за сите нас“, напиша тој.