Македонскиот пејач Даниел Кајмакоски по вторпат стана татко.
Радосната вест ја сподели со своите фанови на „Инстаграм“ каде што објави и фотографија од синот.
„Дами и господа, ова е Стефан кралот“, напиша гордиот татко.
Името Стефан (исто така и Стеван), води потекло од грчкиот збор „stephanos“, што значи круна, венес, па името Стефан буквално би значело крунисан. Името е длабоко поврзано со верата и со симболиката на венецот. Во христијанството, венецот е симбол на надеж, вечен живот и бесконечност. Венците ги пратат христијаните во текот на целиот живот.
Името Стефан е едно од најчестите имиња на светот и се среќава речиси во сите јазици. Колкава е популарноста на ова име низ историјата, зборува и фактот дека ова име го носеле многу кралеви и папи.
Јавноста не знае речиси ништо за неговата втора сопруга, а тој секогаш со емотивни зборови на социјалните мрежи не’ потсетува дека по бурниот развод конечно е среќен.
„Те сакам, не само поради тоа што си, туку и поради тоа што сум јас кога сум со тебе“, ѝ напиша на саканата пред неколку месеци.
На Кајмакоски, кој своевремено не’ претставуваше и на „Евросонг“, многумина му предвидуваа блескава кариера, но кога публиката најмногу очекуваше од него тој одлучи да му се посвети на приватниот живот.
Се ожени со манекенката и пејачка Кристина Димитријевска, го добија синот Давид, но љубовта кратко им траеше.
Разидувањето им беше скандалозно, барем така пишуваа медиумите.
„Јас сум и мајка и татко на мојот син“, изјави Димитријевска во едно интервју.
На прашање од новинарката во какви односи е со поранешниот сопруг, таа кратко порача дека не сака да се враќа во минатото и дека има други многу поубави работи за кои може да се зборува.