Мелиса Локарт, 43-годишна жена од Ричмонд во Џорџија, била уапсена под сомнение дека се обидела да ја прикрие смртта на нејзината мајка поради финансиска добивка.
Миријам Лин Локарт (67) починала во својот кревет на 31 мај 2021 година, а нејзиното тело го пронашла ќерка ѝ со која живеела.
Со надеж дека ќе успее да ја прикрие нејзината смрт за да продолжи да ја добива целата пензија, Мелиса одлучила да ја погреба мајка си во дворот.
Тоа го направила во текот на ноќта верувајќи дека никој нема да ја види, но не било така. Сосетката од другата страна на улицата видела се’ низ прозорецот и по два дена дошла кај Мелиса да ја праша како е мајка ѝ.
Мелиса почнала да ја убедува дека не ѝ е добро, дека е врзана за кревет и дека не знае кога ќе се опорави. Тогаш сосетката ја алармирала полицијата.
Кога надлежните пристигнале на терен, Мелиса не била дома. Сосетката им го покажала делот од дворот каде се сомневала дека е погребана несреќната жена. Кога Мелиса се вратила, и на полицајците им ја повторила истата приказна.
„Тврдеше дека мајка ѝ е заразена и дека никој не смее да влезе во нејзината соба. Потоа ја замоливме да го провериме дворот и во истиот момент го смени расположението. По неколку минути, кога ѝ рековме дека имаме налог да го раскопаме дворот, ни призна се’. Всушност, прво ни тврдеше дека едноставно не можела да се одвои од мајка си, па затоа ја погребала во дворот, а не на локалните гробишта. Малку подоцна, комплетно се скрши психички и призна која била вистинската причина“, раскажа Џери Бретс од полицијата во Ричмонд.
