По долго боледување, почина славниот пејач, гитарист и композитор Роби Робертсон, јави „Варајети“.
Ќе остане најзапаметен како лидер на американско-канадската група The Band.
„Во моментот на неговата смрт Роби беше опкружен со семејството, вклучувајќи ја неговата сопруга Џенет, поранешната сопруга Доминик, нејзиниот партнер Николас и децата Александра, Себастијан и Делфин со партнерот Кени. Позади себе ги остави и внуците Ангелика, Донован, Доминик, Габриел и Серафина. Робертсон неодамна го заврши својот четиринаесетти филмски музички проект Killers of the Flower Moon“, напиша неговиот менаџер во соопштението.
Робертсон имаше близок однос и одлична соработка и со легендарниот холивудски режисер Мартин Скорсезе.
Откако во 1976 токму Скорсезе го сними документарецот за последниот концерт на The Band, култниот „Последниот валцер“, Робертсон соработуваше со режисерот како композитор и музички продуцент, речиси на сите негови филмови, од „Разјарениот бик“, преку „Волкот од Вол стрит“, до „Ирецот“ и последниот, „Месечевиот цвет“.
