На 35-годишна возраст почина Меди Анхолт, ѕвездата на Би-Би-Си која водеше битка со редок и агресивен рак на мозокот, јавува „Дејли мејл“.
На Анхолт ѝ беше дијагностицирана болеста откако минатата година ја роди својата ќерка.
Таа е позната по улогите во неколку ситкоми и беше редовна гостинка во емисијата This Morning. Публиката ја препознаваше и како амбасадор за помош на жените и напиша две книги за семејно насилство и токсични врски.
Семејството ја објави тажната вест неколку часа откако таа почина и откри дека последните недели ги поминала во домот на нејзините родители.
„Со длабока тага објавуваме дека почина Меди Анхолт, нашата сакана ќерка, сестра, пријателка, сопруга и мајка која го напушти овој свет во средата, на 13 септември, на 35-годишна возраст“, напишаа тие на страницата GoFundMe.
Ѕвездата, која позади себе ги остави сопругот Бен, едногодишната ќерка Опал, нејзиниот брат близнак Том, сестрата Клер, мајка ѝ Кетрин и татко ѝ Лоренс, беше подложена на бројни операции за време на нејзината битка пред трагичната смрт.
Во последната објава која Меди ја сподели на „Инстаграм“ пред неколку месеци, таа пишува за своите планови во иднина. Гордо позираше со своите книги во црвен фустан.
„Сега всушност живеам во црвени фустани и со кармин што се совпаѓа со корицата на мојата книга. Погледнете одблизу и ќе видите повеќе кутии несигурно избалансирани на маса со книги и со цвеќиња. Зад кулисите на соништата“, напиша Меди.
