Во Белград почина легендарната џез-пејачка Нада Кнежевиќ, соопшти нејзиното семејство.
Таа ќе биде погребана во Алејата на заслужни граѓани на Новите гробишта во српската престолнина, а по нејзина желба нема да има чествување и церемонијата ќе се одржи во кругот на најблиските членови на семејството.
За време на нејзината педесетгодишна кариера, Кнежевиќ доби неколку фестивалски награди, а Здружението на џез-музичари ѝ го додели највисокото признание за нејзиниот придонес во развојот на музичкото творештво.
Својот последен концерт наречен „Надеж за Белград“ го одржа во 1995 година, а во 2007 година доби награда за животно дело на џез-фестивалот Нишвил, пишува N1.
Имаше 83 години.