Македонскиот виртуоз на виолина, маестро Зоран Џорлев, пред точни три години почина од Ковид-19, а позади себе остави дела кои никогаш нема да ги заборавиме.
Сепак, негов најголем животен успех се сопругата и децата.
Легендарниот музичар и професор има интересна љубовна приказна. Во интервјуата со задоволство зборуваше за сопругата Офелија, инаку дипломиран правник, со која има два сина, Наско и Мартин кои исто така ја одбраа музиката како нивна професионална определба.
Офелија ја запознал на нејзината апсолвентска вечер во „Кајак-клуб“ во Градскиот парк. Таа вечер случајно навратил таму со своето друштво од оркестарот на Операта.
– Имаше многу гости во кафеаната, но мојот поглед падна таму каде што требаше. Во животот нема ништо случајно. Целиот живот бегав од Струмица, градот во кој сум роден и мислев дека нема да земам жена оттаму. Но, патиштата господови се чудни, иако не се случајни – изјави Џорлев во едно интервју.
Во 2018 година Џорлеви прославија 25 години брак. Тогаш маестро Џорлев на „Фејсбук“ напиша дека Офелија го освоила со едноставноста, чесноста, борбеноста и работливоста.