Српскиот политичар Срѓан Ного се огласи со нови контроверзни тврдења.
Тој во својата последна објава тврди дека покрај Вања, требала да биде убиена и нејзината помала сестра. Вели дека целта не била изнуда туку убиство и на двете девојчиња.
Среќната околност за сестрата на Вања, според Ного, била што помалата сестра немала прв час тој ден.
„Вања Ѓорчевска е убиена во нарачана и платена ликвидација. Никогаш не постоел план таа да се киднапира поради откуп. Туку од почетокот е планирано нејзино убиство и убиство на нејзината сестра. Тој план требаше да биде реализиран уште во петок на 24-ти ноември. Среќа во несреќа е што тој ден нејзината помлада сестра Миња немала прв час, па ја киднапираа и убија само Вања“, вели контроверзниот политичар.
Тој се сомнева и околу мотивот за евентуално киднапирање.
„Зошто таткото на Вања ѓ би влегувал во така небулозна ситуација кога има три стана во свое сопствеништво. Да му требале пари можел без никаков проблем да продаде некој од своите станови, или дури и сите три, и да земе 500 илјада евра за нив. Становите се негови и со нив може слободно да располага“, вели тој.
И во претходните објави тој застана во одбрана на таткото на Вања.
„Снимките докажуваат дека тој лично, а не полицијата, го открил, поврзал и разрешил случајот со исчезнувањето на Панче Жежовски и неговата ќерка, па ги предал доказите за што е неправедно осомничен, уапсен, и медиумски сатанзиран. Ќе објавиме и многу други информации скриени од јавноста“, најави претходно Ного.