Контроверзниот српски политичар Срѓан Ного кој на социјалната мрежа „Икс“ објави фотографии во врска со двојното убиство на Вања и Панче, за денеска имаше најавено нови ексклузивни материјали, но се предомисли и не ги објави.
Тој на „Јутјуб“ сподели само кратко видео во кое тврди дека таткото на 14-годишната Вања ги открил виновниците и го решил случајот.
За утре најави досега невидени информации и видео на неговиот јутјуб-канал.
Во денешната објава вели дека има снимки од бензинска станица каде се гледа како Панче Жежовски е заедно со киднаперите, но се слуша и таткото на Вања како разговара со инспекторите.
Со овие објави српскиот политичар отвора сомнеж дека токму таткото на убиената Вања го открил целиот случај, а не полицијата.
Александар Ѓорчевски, таткото на Вања, сѐ уште е во притвор.
„Снимките докажуваат дека тој лично, а не полицијата, го открил, поврзал и разрешил случајот со исчезнувањето на Панче Жежовски и неговата ќерка, па ги предал доказите за што е неправедно осомничен, уапсен, и медиумски сатанзиран. Ќе објавиме и многу други информации скриени од јавноста“, најавува Ного.
