Коста Кецмановиќ, 14-годишното момче кое на трети мај во ОУ „Владислав Рибникар“ во Врачар уби девет другари и училишниот чувар Драган Влаховиќ, во повеќе наврати покажа дека нема чувства и милост, а она што последно им го кажал на надлежните ги шокирало сите.
Наводно, Кецмановиќ точно им објаснил што му се допаѓа, а што го излудува.
„Коста во неколку наврати повторил дека не му е грижа и не му е гајле за злосторството што го направил. Тој изјавил и дека ги обожава животните, но дека луѓето го излудуваат. Таму ги навел не само децата и неговите родители, туку и многу други со кои бил во контакт до својата 14-та година“, дознава српска „Република“ од неименуван извор.
Како што открива нивниот соговорник, Коста бил заинтересиран само за слобода.
„Станува збор за момче кое едноставно нема милост и чувства кон другите. Единственото нешто за кое се грижи е самиот себе и неговата слобода по која моментално копнее“, вели тој.
Утре почнува судењето на родителите на Коста Кецмановиќ. Неговиот татко Владимир Кецмановиќ е во притвор. Тој се сомничи дека оружјето што го поседувал во станот не го чувал соодветно, како и дека синот го однел на стрелиште, каде што го обучувал да употребува огнено оружје.
