Поминаа две децении откако Марија Васиќ беше прогласена за Мис на Македонија во тогаш преполната Универзална сала.
Со убавина, грациозност и шарм победи на, во тоа време, најпрестижниот избор за убавина кај нас.
Од времето кога во 2003 година отпатува во Кина за да ја претставува Македонија на Мис на светот до сега многу нешта се сменија во животот на Васиќ.
Таа денес е доктор-анестезиолог и мајка на два сина.
„Професијата доктор е навистина најхуманата професија, со право од Бога благословена и до Бога возвишена од самото раѓање па сѐ до смртта! Веќе шест години како доктор-анестезиолог работам во приватна клиничка болница.
Мојата професија подразбира голема одговорност и посветеност кон тешко болните, но задоволството и насмевката на секој пациент, го анулира мојот секојдневен стрес и ми дава дополнителна мотивација да бидам уште подобра и поуспешна во тоа што го работам“, раскажа Васиќ во едно од ретките интервјуа кое го даде лани откако се појави на манифестацијата „Златна Бубамара на популарноста“ за да му врачи награда на Мирослав Илиќ.