Триесет и двегодишен македонски државјанин во саботата околу 2 часот по полноќ до смрт бил претепан во Есен, Германија, јави германскиот весник „Билд“.
Осомничени се двајца Еритрејци на возраст од 25 и 29 години кои, како што јавуваат тамошните медиуми, го тепале со пивско шише додека тој не колабирал. Потоа побегнале од местото и се упатиле кон главната железничка станица.
На тепачката ѝ претходела вербална расправија.
Случаен минувач се обидел да му даде прва помош и да го реанимира македонскиот државјанин, кој веќе бил во несвест, но веќе било доцна.
Обдукцијата на телото покажала дека причината за смртта е повреда од тап предмет.
На социјалните мрежи почна да се споделува фотографија од жртвата.
„Убиено златно дете од Жировница ( Маврово-Ростуше ) мој соселанец“, напиша еден член во фејсбук-групата „Македонци во Германија“.
„Детево ни криво ни должно излегло на прослава и не се вратило дома, судбината така сакала, да биде на погрешно место во погрешно време“, пишува тој.
