Денеска во повеќе од 40 земји во светот се прославува Денот на мајката. Убава можност да им кажеме на жените кои не’ родиле колку ги сакаме, но и да ги спомнеме оние мајки кои не се повеќе меѓу нас.
Популарната пејачка, авторка и професорка Андријана Јаневска лани на овој ден сподели емотивна посвета за својата прерано почината мајка.
– Ти умееше карпата во свила да ја претвориш, а песокот во црница. Пред тебе рибите прелетуваа, а птиците препливуваа. Дождот стануваше утринска роса, а ветерот полноќен здив. И камењата цветаа покрај тебе. На гнездата им никнуваше кров, а трњето разеленуваше. Сега, во мојата душа копнеж се раѓа: Да ме родиш пак, мајко моја, та и градот во селата да ме бара, и пес во бунар да нурка, и гром во пештера да грмне – да не ме пронајде. Скриена ќе бидам во твојата прегратка – напиша Јаневска и им порача на фановите да си ги гушкааат мајките додека сè уште можат.
На својата прерано почината мајка на овој меѓународен Ден на мајката се потсети и Маја Вукичевиќ.
– Пред да заспиеме секоја вечер ни носеше топло млеко во кревет, не гушкаше и не заливаше со љубов.. Талентирана, убава, ведра, нежна, одличен кулинар, детски наивна… Веруваше дека љубовта ќе го спаси светот… Често ѝ се лутев и ѝ велев да ги извади тие розеви очила, но таа победи, не „зарази“ сите со нејзината верба, надеж и љубов! Беше грижлива мајка и баба, најдобар пријател… Со еден збор вистинска МАЈКА! 26 години беше покрај мене, а недостасуваш секој ден Миче моја. Ти благодарам за сѐ! Не дочека да гушнеш уште две ангелчиња, но верувам дека таму од горе не чуваш сите! – напиша пејачката на „Фејсбук“ минатата година.
Лани и водителката Милена Антовска Станковска сподели интересна фотографија на овој ден која ги разнежни оние што ја следат на социјалните мрежи.
– Три генерации! Сакајте ги своите мајки, гушкајте ги, радувајте им се, почитувајте ги, бидете нивната радост, нивната утеха… Среќен ден на мајките! – порача Милена.
Ј.П.
* Текстот не смее да биде превземан без дозвола на редакцијата на МАСТИЛО.
