Почина Габриела Анели, 23-годишната Бразилка, која пред два дена беше погодена со пивско шише во вратот за време на тепачка меѓу приврзаниците на фудбалските клубови Палмеирас и Фламенго.
Полицијата соопшти дека уапсила 26-годишен маж кој е осомничен за нејзината смрт, пренесува АП.
Анели, симпатизерка на Палмеирас, била повредена додека се обидувала да влезе на стадионот Алијанц Парк во Сао Паоло на натпреварот од бразилската лига во саботата. Палмеирас и Фламенго одиграа нерешено 1-1.
Палмеирас на своите канали на социјалните мрежи објави дека Бразилците „не можат да прифатат 23-годишна жена да биде жртва на варварство на место наменето за забава“.
Клубот ги повика властите да го истражат случајот, за кој велат дека „го повредува имиџот на бразилскиот фудбал“.
Одделен инцидент се случи во друг дел од истиот стадион непосредно пред Анели да се повреди и да го принуди судијата двапати да ја прекине играта.
Едналдо Родригез, претседателот на Бразилската фудбалска конфедерација, изјави дека соработуваат со властите „за да не се повторат вакви криминални и тажни епизоди“.
