Не стивнуваат реакциите по трагедијата во Кочани која утрово ја вознемири македонската јавност.
Жена (46) беше убиена со 40 убоди од нож пред семејната куќа во Кочани. Напаѓачот е приведен и се утврдуваат мотивите за убиството.
Од Министерството за внатрешни работи потврдија дека жената претходно го пријавувала убиецот дека подолго време ја уценувал дека ќе објави компромитирачки видеа и фотографии ако не му даде пари.
Локалната „ТВ Стар“ објави дека осомничениот постојано ја следел, а тоа што го пријавила не го загрижило, бидејќи наводно имал рак на простатата. „Јас нема да живеам, ама нема да живее ни таа“, наводно велел убиецот, пренесе телевизијата.
И додека едни изразуваат сочуство до семејството на починатата, други пишуваат скандалозни постови на социјалните мрежи од типот дека „убиената сама си го барала“.
„Малце ѝ биле 40 убоди, барем 80 да ѝ направел.. Жена, мајка на три деца, во врска..Ах, бе“..коментира еден корисник на „Фејсбук“.
Друг се надоврзува и пишува: „Мајка ѝ ја барала со три деца да бара швалер.. Па уште да се снима при однос со него“..
Принтскрин од коментарите објави и инфлуенсерката Ина Многуфина, прашувајќи дали ваквите лица некогаш ќе одговараат за своите постапки.
Инаку, граѓанските организации кои работат на заштита и поддршка на жртвите од семејно насилство, особено жените, нагласуваат дека надлежните институции тешко ги препознаваат заканите и можните последици.