Смртта на Ана повторно ја разбранува јавноста
Дваесетгодишната Ана Белисарио лани во февруари почина во болницата „Сан Рафаеле“ во Италија откако доживеа анафилактичен шок додека вечерала со своето момче во ресторан за брза храна во Милано на 26 јануари.
Дури сега, една година по трагедијата, покрената е истрага за нејзината смрт, откако се покажа дека Ана била алергична на млечни производи, а ѝ бил послужен десерт од тирамису кој бил направен со млеко, иако во менито било наведено дека е веганско.
Две жени кои во тој период биле одговорни за снабдување на ресторанот со десерти се под истрага за убиство од небрежност. Прелиминарната истрага сугерира дека осомничените ја измешале фактурата за вегански слатки со десерти што содржеле млеко, што резултирало со фатален исход за младата жена, пишува италијанскиот весник „Кориере дела сера“.
Во извештајот од истрагата се тврди дека компанијата не спречила мешање на две производни линии во лабораториската слаткарница, која во тоа време снабдувала 63 италијански ресторани со веганскиот производ Тирамису.
Во реконструкцијата, која била направена во понеделникот, речиси една година по смртта на Ана, обвинителите тврдат дека не се почитувало одвојувањето на состојките и дека персоналот не добил соодветна обука.