Ново потресно сведоштво на легендарниот актер, музичар и шоумен
Во своето последно интервју Игор Џамбазов отворено зборува за своите коцкарски долгови. Легендарниот актер и шоумен во гостувањето кај популарниот јутјубер Стефан Лазаров спомнува вкупна сума со камати од 50.000 евра која, како што вели, ја должел на три-четири места. Сето ова се случува во времето кога со месеци му се губи траг и ја пишува неговата автобиографија „Гол човек“.
„Сите ги имам проколнато. Некои дури сакаа да го малтретираат татко ми Џамбаз. Среќа, не се случи тоа. Само уште еден е жив, ама како да не е. Болен е од триста болести, мислам дека не може ни да се измо*а сам човекот.. Значи, кога ќе те стигне клетва од глумец-коцкар нема спас“, раскажува Џамбазов.
Во истиот подкаст тој сведочи и за постојаните малтретирања со кои се соочувал. Признава дека дури завршил и со пиштол в уста, но и дека еден од ретките луѓе кои му помогнале во тој период е сега веќе покојниот Горан Георгиевски-Мујо, поранешен командант на расформиранта Единица за брза интервенција „Лавови“.
„Беше човек за кого тврдеа дека е криминалец од нависока лига, ама не познавам криминалец на кој му дошле 10.000 луѓе на погреб. Мујо беше една посебна приказна, еден Робин Худ.. Сакаше да ги малтретира богатите и да им помогне на сиромашните.. Е, притоа и тој ќе заработи, но не ги сакаше ич тие што имаа многу пари, бидејќи го знаеше начинот како тие го направиле тоа, како заработиле..“, завршува Џамбазов.
